Hoʻākea Source Nā Moho Lanakila (MH 2024)

Ka Ulu Hau

Nālamakūikapō Ahsing & Kamehanaokalā Taylor
Moho Lanakila no ka MH 2024

Na Ka Ulu Hau e paipai i ko Hawaiʻi kūʻokoʻa ma nā pae he pilikanaka, he hoʻokele waiwai, a he kūlohelohe ma o ka hoʻohana hou ʻana i ka hau ma ke ʻano he kumu waiwai i ka ʻāina me ka moʻomeheu. I kēlā mau makahiki ʻekolu i hala aku nei, na Nālamakūikapō me kona kōkoʻolua ʻo Kamehanaokalā i noiʻi aku i ka pono o ka hau ma ke ʻano he kumu waiwai ʻōiwi e mau loa ana no ka hana mea pepa. Wahi a lāua, hiki i ka hau ke hōʻoi i ke kūlana kūʻokoʻa a hōʻokoʻa i nā ʻoihana hoʻokele waiwai ma Hawaiʻi, me ka waele ʻana hoʻi i alahele e kahukahu ʻia ai ka pilina o ka ʻāina me kānaka. Me ia manaʻo, na lāua e mālama aku ana i 10 hālāwai hana pepa hau i manuahi i ke kaiaulu ma nā hui kaiaulu like ʻole, a na lāua hoʻi e hoʻokumu aku i laʻana paʻi pepa no nā hui i ʻuʻuku ai ke kālā.

---

Ua hānau ʻia ʻo Jonathan Day Nālamakūikapō Ahsing i Oʻahu i ka MH 1998 a hānai ʻia ʻo ia ma Puʻuloa, ʻEwa e kona mau lūauʻi ʻo Alan lāua ʻo Karin Ahsing. ʻO kēia Kanaka Maoli, he mea hana noʻeau, he mahiʻai, a he haumāna hoʻokele ʻo ia ma ka Hōkūleʻa. Na kā Nālamakū hana e hoʻohanohano aku i kona mau kumu, kona aloha i ka ʻohana, a me ka mana o kona ʻāina. ʻO ka piko o kāna hana, ʻo ia nō ka ʻike kupuna pili kaiaola, a he hana ia no ke ola, ka ʻāina, a me ke ea o nā Kānaka Maoli. ʻO kāna kaʻina hana, ʻo kona mokupuni nō ia, kahi āna e nīnau aʻe ai penei: He aha ka ʻike e noho ana i ka lauana? Pehea kākou e hoʻohana ai i ka ʻike ʻŌiwi no nā haʻina o kēia wā? Pehea hoʻi kākou e hoʻohana aku ai i kahi ʻōlelo ma ke ʻano he nuʻukia kupanaha, kahi ʻōlelo hoʻi nāna e paipai i ka pili kaukaʻi ʻana o kekahi i kekahi? ʻO wai lā kākou ma ke ʻano he kūpuna o ka wā e hiki mai ana?

Kūpaʻa kā Nālamakū hana i ka hoʻomau ʻia ʻana o kona ʻōlelo, ka moʻolelo, ka moʻomeheu, a me ke kaiaulu. Ma kāna hana e hōʻike ʻia ai ke aloha ʻāina ma o ke kāpala ʻia ʻana o ka ʻohe a me ke kiʻi, ka hana pepa, ke kālai, a me ka hoʻōla ʻana i ka ʻāina a me ka moʻomeheu. Ke noho nei ʻo ia i Waimānalo, a ʻo kēia hoʻi ka ʻĀina Restoration Coordinator ma Kauluakalana, kahi āna e mālama ai i ka ʻāina e noho ai ka heiau ʻo Ulupō me ka loko iʻa ʻo Kawainui. Ua puka ʻo ia mai ke Kula ʻo Kamehameha me Williams College (Honors BFA, BS).
  
Eia nā hōʻikeʻike i loaʻa ai kā ia nei papahana: ʻAi Pōhaku, Stone Eaters ma nā kulanui kaiaulu ʻo Kona me Kapiʻolani; Mai Hoʻohuli ka Lima i Luna ma ko Hawaiʻi Hale Hōʻikeʻike Hana Noʻeau Mokuʻāina, He Noho Pili Kua//He Noho Pili Alo ma Aupuni Space, a me Unstable Connections ma Williams College Museum of Art. 

---

ʻO Kamehanaokalā Taylor, he Kanaka Maoli ʻo ia, a he mea noiʻi, he mea kākau, he mahiʻai, a he kupa hoʻi no Waikupanaha, Waimānalo, Oʻahu. Ua hoʻokumu ʻia kā Kamehana hana e nā waihona ʻike Hawaiʻi, ka noiʻi kumu ʻike kahiko, a me ka ʻike e aʻo mai ai ma ka hoʻōla ʻāina ʻana. Ma o ke kālele ʻana i ka ʻike, ka moʻolelo, a me ka ʻōlelo he Hawaiʻi, na kā Kamehana kākau ʻana e paipai i ke kahukahu hou ʻana i nā pilina ma waena o ka ʻāina me kānaka ma o ke alu like a me ka hana kuʻuna ʻana.

Ke ʻimi nei ʻo Kamehana i kēkelē laeoʻo he M.A. ma ka ʻōlelo Pelekāne ma ke Kulanui o Hawaiʻi ma Mānoa. Ke hana pū nei ʻo ia me Puʻuhonua Society e hoʻolilo pūnaewele a hoʻoponopono i nā palapala kākau leo o ka ʻohina kiʻiʻoniʻoni nui ʻo Nā Maka o ka ʻĀina na Joan Lander me Puhipau. Me he mahiʻai lā, na Kamehana e mahi i nā meaʻai kuʻuna ma ka ʻāina mahi o kona ʻohana, e laʻa ka ʻulu, ke kalo, a me ka ʻuala.

Ua hāʻawi ʻia aku nei ʻo Kamehana i ka haʻawina kālā ʻo Red Mandarin and Lady Yi-suen Shen Scholarship e ke Keʻena ʻŌlelo Pelekāne o ke Kulanui o Hawaiʻi. Ua hāʻawi ʻia hoʻi ʻo ia i ka John Young Scholarship in the Arts mai ko ke Kulanui O Hawaiʻi College of Arts and Sciences.