ʻO Hoʻākea Source kekahi papahana haʻawina kālā e hoʻākea aʻe ana i ke ala nuʻukia o Puʻuhonua Society ma o ka paepae ʻana i nā kahua hou e kākoʻo ai a e hoʻohanohano ai i ka poʻe pāheona e noho nei a e hana nei ma Hawaiʻi nei, a ma o hoʻi ka hōʻoia ʻana i ke kuanaʻike Hawaiʻi.
I loko o ka hana a Hoʻākea Source, hoʻokino ʻia maila ka ʻōlelo noʻeau laha loa ʻo “ʻike aku, ʻike mai, kōkua aku, kōkua mai; pēlā ihola ka nohona ʻohana.” A ma ia laulima like ʻana ma ke ʻano he ʻohana, pēlā kākou e ola mau aku ai, a ʻo ia hoʻi ka mea e pili ai a paʻa kākou i ko kākou poʻe kūpuna me ko kākou ʻāina kupuna.
He Hoa Papahana Haʻawina Kālā o kekahi Māhele ʻĀina ʻo Hoʻākea Source ma lalo o ka ʻoihana ʻo Andy Warhol Foundation for the Visual Arts. Hana like nō ia papahana haʻawina kālā me nā ʻoihana pāheona kūloko a puni ke aupuni i mea e kōkua kālā ai i nā papahana pāheona hou i loko o nā kaiāulu.
ʻImi mau ʻia ka hoʻokō ʻana i ka hoʻoilina a Andy Warhol ma o ke ala nuʻukia o ka ʻoihana ʻo Andy Warhol Foundation for the Visual Arts, ʻo ia hoʻi ka hoʻoholomua ʻana aku i ka ʻoihana pāheona i ke au nei. Mālama ʻia nō e ia ʻoihana kekahi papahana haʻawina kālā ma o nā ʻano kulekele laikini a me nā ʻano noiʻina noelo no ke kūkulu ʻana i nā papahana ʻohiʻohi moʻolelo mea pāheona. A hiki i kēia au nei, ua hāʻawi ʻia he $280 miliona ma o ka papahana haʻawina kālā i nā ʻano ʻoihana pāheona he 1,000 ma loko o 49 mau mokuʻāina a ma ʻō aku, a hāʻawi makana ʻia nō he 52,786 mau pāheona i nā ʻoihana he 322 a puni ka honua.
ʻIkepili
Ka wā haʻawina kālā (MH 2024–25):
No ka wā haʻawina kālā e hiki mai ana (MH 2024–25), na Hoʻākea Source e hāʻawi aku ana i ʻeiwa haʻawina kālā a ʻoi aku paha, mai ka nui he $2,000 a i $10,000 i nā papahana e koho ʻia. No ka lua o kēia wā haʻawina kālā, e hāʻawi pono ʻia ke kālā he $90,000 i nā mea hana noʻeau ma muli o ke kōkua hou ʻia ʻana mai e Laila Twigg-Smith Art Fund o ka Hawaiʻi Community Foundation. I kēia wā haʻawina kālā mua loa he ʻelua makahiki, na Hoʻākea Source e kālele i nā mea hana noʻeau ʻike maka, nā papahana i nui ai nā lima alu like, a me nā hui hana e noho a e hana nei ma Oʻahu.
Nā Koina:
E maliu ʻia ana nō nā palapala noi ma luna o kēia mau koina. He pono nō ka pili o kekahi papahana i kekahi o kēia mau ala koʻikoʻi he ʻekolu:
- ʻĀina: ʻO nā noi nō ia e pili paʻa pono ai i kēia wahi ma ke aloha a me ka mālama ʻana i ka ʻāina, ka lani, a me ka moana.
- Pilina: ʻO nā noi nō ia e hiʻi pono ai i nā pilina koʻikoʻi e pili ai i ko mua, ko hope, me ko ke au nei i loko o ka hui laulima like ʻana.
- Huli: ʻO nā noi ia e hōʻoia ʻia aʻe ai he ʻano Kanaka ʻana ma luna o ka ʻike o ka wā ma mua no ka pono o ka noho kanaka ʻana i kēia mua aku.
Eia nā mea e pono ai kekahi noi kūpono:
- Akāka ke kumuhana nui o ke noi, nā mea nāna e komo ana i ka hana, a me ke kuhi pono pū i ke ala koʻikoʻi nui e pili pū ana
- Akāka ka moʻokūʻauhau pāheona Hawaiʻi e pili pū ana i ka hana pāheona a ke noi
- Akāka ka hiki ke hoʻokō i nā pahu hopu o ka papahana i loko o ka palena manawa a me ka palena kālā
- Akāka ke ʻano e pili ai ke kaiāulu nui ākea i ka papahana me ke kālele pū ʻana ma nā ʻano hōʻikeʻike pāheona maʻamau ʻole
- Akāka ka hopena e loaʻa ana i ke kaiāulu nui ākea a me ke kaiāulu pāheona a moʻomeheu hoʻi o Hawaiʻi nei
Ke Kōmike Koho a Wae:
ʻEkolu a ʻelima paha mau lālā o ke kōmike koho a wae, a ʻo ka hapa nui nō hoʻi kekahi mau mea pāheona a kahu mālama hōʻikeʻike pāheona paha mai loko mai o nā kaiāulu Hawaiʻi. Kono pū ʻia nō hoʻokahi a ʻelua paha kahu mālama hōʻikeʻike pāheona mai waho mai o Hawaiʻi nei me ke kākoʻo pū ʻia e ka Luna Papahana me ka Luna Hoʻokele o Puʻhonua Society.
ʻO wai ʻo Laila Twigg-Smith Art Fund o ka Hawaiʻi Community Foundation?
ʻO Laila Twigg-Smith kekahi mea ʻohi pāheona i kaulana loa, a he mea paipai nui ʻo ia i nā mea hana noʻeau a me nā hale hōʻikeʻike, a he mea hana noʻeau a he loea nuʻukia ʻo ia. Na Laila Twigg-Smith Art Fund o ka Hawaiʻi Community Foundation e hoʻomau aku i kēia hoʻoilina ma lalo o kona inoa. Nā ia mea e hānai a paipai iā Hawaiʻi ma ke ʻano he kikowaena pae honua no ke kūkaʻi aku, kūkaʻi mai o nā mea hana noʻeau o kēia wā. Kākoʻo kēia waihona kālā i nā papahana e hiki ai i nā mea hana noʻeau ke luʻu i nā kai malihini no ka hoʻokino ʻana i nā nuʻukia hou me ka hopohopo ʻole ʻana i nā mea e pono ai ko lākou nohona i kēlā me kēia lā.
He $90,000 ka nui o nā kālā e hāʻawi ʻia ana no ka wā haʻawina kālā (MH 2024–25), ma muli o ke kōkua hou ʻia ʻana mai e Laila Twigg-Smith Art Fund o ka Hawaiʻi Community Foundation.
Wā Haʻawina Kālā 2025
- ʻOkakopa 2024: Hoʻolaha Papahana
- Nowemapa 2024: Ka Hoʻolaha Ākea ʻana me nā Hālāwai Pili Papahana
- Nowemapa 28, 2024: Wehe ka wā noi
- Kēkēmapa 2024: Mālama ʻia nā hālāwai pili papahana no ka lehulehu
- Ianuali 2025: Kūkākūkā pākahikahi
- Ianuali 31, 2025: Pani ka wā noi
- Pepeluali 2025: Nānā ʻia nā palapala noi e ke kōmike, a koho a wae ʻia nā moho kūpono loa.
- Malaki 2025: Hoʻomaopopo ʻia nā moho i koho ʻia
- Malaki 2025: Hoʻomalele ʻia ka haʻawina kālā mua.
E wehe ʻia ana ka wā mua loa o ke noi haʻawina kālā ʻana ma ka Lā Kūʻokoʻa o ke Aupuni Hawaiʻi, ka lā 28 o Nowemapa 2024.
Nā Moho Lanakila Kālā Mua Loa no ka MH 2024
Eia ʻo Hoʻākea Source ke kūkala nei i ka hui moho lanakila mua loa e hāʻawi ʻia ana i ka haʻawina kālā he $5,000 a i $10,000. He makahiki ko nā mea lanakila kālā e hoʻokino ʻia ai nā papahana like ʻole i pili i ka ʻāina, ka pilina, a me ka huli.
Ua hālāwai pū nā mea loiloi kūwaho he pūkolu no ka loiloi ʻana i nā palapala noi a me ke koho ʻana i nā moho lanakila ma kahi o nā moho a pau he 38. Na kēia mau papahana e hoʻolauleʻa i nā hana like ʻole a nā mea hana noʻeau ma Hawaiʻi, e laʻa kēia mau mea he puke pai, he hōʻikeʻike, he ʻaha hulahula, he kiʻiʻoniʻoni pōkole me ka moʻolelo ʻole, he kiʻiʻoniʻoni lōʻihi hōʻike ʻoiaʻiʻo, he mau pāhiahia pāpaho like ʻole, he hōʻike maka ʻia ʻana o ka ʻikepili, he mau hālāwai hana no ke kaiaulu me nā haumāna, nā ʻaha kuʻuna, a me nā hanana.
He manawa kūpono ko kēia mau moho lanakila e hoʻokō i ko lākou makemake ponoʻī i kēia makahiki aʻe, a hiki iā lākou ke koho i kahi a me ke kaiaulu e hōʻike ʻia ana kā lākou papahana ponoʻī. Kau ka maka o Hoʻākea Source e ʻike i ka hoʻokino ʻia ʻana o nā papahana a me ka hopena makepono ma luna o nā kaiaola noʻeau kamaʻāina mai Hawaiʻi a ʻō aku.
Nālamakūikapō Ahsing & Kamehanaokalā Taylor
ʻili
Kalikopuanoheaokalani Aiu
the infinite belongs to us
Bradley Capello & Madelyn Biven
ʻĀINAVIS
Sean Connelly
Welcome to Here
Kainoa Gruspe
Nā Mea Loiloi no ka MH 2024
Ua hālāwai nā mea loiloi he pūkolu no ke koho ʻana i nā moho lanakila ma kahi o nā moho a pau he 38:
Na Jaimey Hamilton Faris e aʻo aku i ke kālaikuhi loiloi a me ka moʻolelo o ka hana noʻeau kūikawā ma ke Kulanui o Hawaiʻi ma Mānoa. He hoa polopeka ʻo ia i nā keʻena o ka Noiʻi ʻIke Pākīpika, ka Noiʻi Lawena Aupuni ʻĒ, a me ke Kula no Ka Noho me ke Kūpaʻa Mau Loa ʻana.
"Hoʻomaikaʻi i nā moho lanakila mua loa a Hoʻākea Source. He hohonu nō ko ʻoukou poʻokela a me ke kūpaʻa iā Hawaiʻi!"
ʻO Puni Jackson kekahi mea hana noʻeau kaulana a he mea hana kuʻuna Hawaiʻi nāna i alakaʻi i nā papahana aʻo i hoʻokumu ʻia i ka lawena Hawaiʻi a me ka ʻāina no nā makahiki he 20 a ʻoi aku. Ma ke ʻano he mea hana noʻeau, ua kaulana ʻo Puni i kāna mau kiʻi nui i pena ʻia a me nā mea i kūkulu ʻia, a ua hōʻikeʻike ʻia kāna mau mea ma kēia aupuni a me nā aupuni ʻē aʻe.
"Ke ulu nei ko Hawaiʻi hoʻoilina hana noʻeau ma o ka hana a nā moho lanakila a Hoʻākea Source no ka makahiki 2024. E ola ko Hawaiʻi pae ʻāina!!"
ʻO Patrick Flores kekahi Polopeka o ka Noiʻi Hana Noʻeau ma ke Keʻena Noiʻi Hana Noʻeau o ka University of the Philippines, a ʻo ia ka hope alakaʻi ma National Gallery Singapore. ʻO kēia hoʻi ke alakaʻi o ka Philippine Contemporary Art Network.
"He leo hoʻomaikaʻi wale nō koʻu no nā moho lanakila mua loa o kēia papahana hōʻeuʻeu. Paʻa koʻu manaʻo, na lākou nō e hoʻokō i ko lākou nuʻukia ponoʻī a me ko lākou hoʻohiki penei, e noho māhuahua ana ko lākou mau kaiaulu a e māhuahua hoʻi ka hoʻololi ʻana."
He Papa Nīnau
He koina anei kekahi pāhana laulima?
ʻAʻole
Āhea ka palena pau e hoʻokō ʻia ai ka pāhana?
He hoʻokahi makahiki ʻalemanaka ka palena pau mai ka lā i hoʻomaopopo ʻia ai a i ka hoʻihoʻi mai i ka hōʻike hope loa.
Ma ke ʻano he hui laulima, ʻo wai ka mea i helu ʻia ai he alakaʻi?
ʻO ka/nā mea pāheona ka mea i helu ʻia ai he alakaʻi. ʻAʻole naʻe he koina he mea pāheona nā lālā a pau.
Hiki ke kūʻai ʻia nā mea pono hana me ka haʻawina kālā?
ʻAe. Akā naʻe, ʻaʻole hiki ke piʻi aʻe ke kumu kūʻau nui o nā mea pono hana i kūʻai ʻia ma luna o 20% o ka haʻawina kālā.
Hiki anei ke noi haʻawina kālā no kekahi pāhana i hoʻomaka ʻē ʻia?
ʻAe, hiki nō ke hoʻomāhuahua aku i nā pāhana i hoʻomaka ʻē ʻia me kēia haʻawina kālā.
He koina paha ka hōʻoia ʻana a paʻa kekahi wahi hōʻikeʻike ma mua o ke noi ʻana?
ʻAʻole. ʻAʻole koi ʻia ka hoʻopaʻa ʻana i wahi hōʻikeʻike. ʻAʻole koi ʻia kekahi ʻano palapala hōʻoia mai kekahi e komo ana ma kekahi ʻano i ka pāhana.
He aha ka palena loa o ka huina nui kālā e noi ai?
He $10,000 ka palena loa. Inā he $10,000 a ʻoi ka mea e pono ai ka pāhana, e hōʻike leʻa mai nō i nā māhele a Hoʻākea Source e kākoʻo ana.
Hiki ke hāʻawi ʻia i kekahi huina kālā ma lalo o ka huina nui i noi ʻia?
ʻAe. Na ke kōmike koho a wae e hoʻoholo
Pehea a āhea i koho ʻia ai nā haʻawina kālā?
E kono ana ʻo Hoʻākea Source i ʻekolu mau luna koho a wae (no loko a no waho paha o Hawaiʻi nei me ka ʻike a akamai hoʻi ma ke ʻano he kahu mālama hōʻikeʻike pāheona a mea pāheona nō hoʻi). No lākou ana ke kuleana ʻo ka haka pono ʻana i kēlā me kēia noi me ke koho pū ʻana i nā noi kūpono loa.
He aha ke koina ʻauhau, ke hāʻawi ʻia ka haʻawina kālā?
ʻAuhau ʻia nō ke kālā i hāʻawi ʻia e Hoʻākea Source. Paipai ʻia ke kūkākūkā pū ʻana me kekahi mea mālama moʻohelu kālā a mea mālama ʻauhau paha.
Inā he nīnau hou aku, e leka uila aku iā info@hoakeasource.org
Waele aku ʻo Puʻuhonua Society i nā ʻano ala like ʻole no nā mea pāheona Kānaka, nā mea pāheona pili Hawaiʻi, a me nā mea hana noʻeau e pili ai me ke kaiāulu ma o kā lākou hana. Kākoʻo ʻia nō nā ʻano mea e paio ana no ka pono o ke kaiāulu ma o kā lākou hana pāheona a hana noʻeau paha.
No nā makahiki 15 a ʻoi, ua mālama ʻia ma ia kikowaena kaiāulu kekahi mau hōʻikeʻike pāheona, a mālama pū ʻia nō kekahi mau papa kālailāʻau, lāmeka, kaha kiʻi, hoʻomākaukau meaʻai, pena kiʻi, a me nā ʻano hana like ʻole. Ma ia manawa, ua mālama pū ʻia nō ka hanana mua loa a ka Honolulu Symphony ma ke Koʻolau; kekahi hōʻikeʻike pāheona a Jean Charlot, Claude Horan, a me Juliette May Frazier, a me ka pukana mua loa o kā Terrance Knapp hōʻikeʻike haʻiʻōlelo kū hoʻokahi no Father Damien.
I ka MH 1996, ua lilo ʻo Maile Meyer, ke kaikamahine ʻekolu a Emma, ʻo ia ka luna hoʻokele, a i ka makahiki 2004, ua kapa hou ʻia ʻo Young of Heart Workshop i kona inoa hou ʻo Pu‘uhonua Society* i mea e kia pono ai ma luna o ke ala nuʻukia hou, ʻo ia ke kū ʻana o kekahi puʻuhonua no nā mea pāheona a kahu moʻomeheu hoʻi. No nā makahiki he 25, ua kuʻupau loa aku ʻo Maile i ka hoʻokahua ʻana aʻe i mau wahi pāheona e like me CONTACT, he hōʻikeʻike pāheona o ke au nei e mālama ʻia ana no nā makahiki he ʻeono; ʻo The Gathering Project, he wahi e hui like ai a pili ke kaiāulu ma ka Hale Aliʻi ʻo Iolani; a ʻo Aupuni Space kekahi hale hōʻikeʻike pāheona o ke au nei me nā keʻena haku pāheona no ke kaiāulu ma Kakaʻako, a mau nō ke kū ʻana o ia hale a hiki i kēia lā nei me nā ʻano papahana kaiāulu like ʻole.
I kēia lā, alakaʻi ʻia ʻo Puʻuhonua Society e ka Luna Hoʻokele ʻo Emma Broderick, ka wahine hanauna ʻekolu o ka ʻohana Meyer, ke kaikamahine mua hoʻi a Maile. He mau papahana hou aku nō ko Puʻuhonua Society: ʻO Keanahala kekahi hui kaiāulu e hoʻomau ana i nā loina ulana lau hala; ʻO Hoʻomau Nā Maka o ka ʻĀina kekahi papahana e mālama pono ʻia ana ko Nā Maka o ka ʻĀina waihona o nā kiʻi ʻoniʻoni he 8,000 a ʻoi; ʻO KĪPUKA kahi e mālama ʻia ai nā ʻano papa aʻo hana noʻeau kuʻuna i mau loa aku ai ia ʻano ʻike i loko o ke kaiāulu; A ʻo NiUNOW! kekahi papahana hoʻōla ʻike niu a uluniu hoʻi i mea e hoʻomanaʻo ai kākou i ko ka niu waiwai i ke ola pono o Hawaiʻi.
* Ua hoʻokumu ʻia ka ʻoihana puʻuhonua mua i ka MH 1914 e kekahi pūʻulu Kānaka Hawaiʻi, a ʻo Noa Webster Aluli kekahi i loko o ia pūʻulu. He kikowaena kōkua a kākoʻo hoʻi ʻo ka ʻAhahui Puʻuhonua o Nā Hawaiʻi no ke kaiāulu Hawaiʻi i loko o ia wā ʻīnea o ka moʻolelo o ko kākou lāhui ma hope o ka noho hewa ʻana i ke Aupuni Hawaiʻi.
ʻImi mau ʻia ka hoʻokō ʻana i ka hoʻoilina a Andy Warhol ma o ke ala nuʻukia o ka ʻoihana ʻo The Andy Warhol Foundation for the Visual Arts ʻo ia hoʻi ka hoʻoholomua ʻana aku i ka ʻoihana pāheona i ke au nei.
Mālama ʻia nō e ia ʻoihana kekahi papahana haʻawina kālā ma o nā ʻano kulekele laikini a me nā ʻano noiʻina noelo no ke kūkulu ʻana i nā papahana ʻohiʻohi moʻolelo o nā mea pāheona. A hiki i kēia au nei, ua hāʻawi ʻia he $280 miliona ma o ka papahana haʻawina kālā i nā ʻano ʻoihana pāheona he 1,000 ma loko o 49 mau mokuʻāina a ma ʻō, a hāʻawi makana ʻia nō he 52,786 mau pāheona i nā ʻoihana he 322 a puni ka honua.
Kākoʻo ka Papahana Haʻawina Kālā o kekahi Māhele ʻĀina o ka Andy Warhol Foundation i nā ʻano hana pāheona laha ʻole ma o ka hana pū ʻana me nā hui moʻomeheu e alakaʻi pono ana i nā kaiāulu a puni ke aupuni. Ma o nō hoʻi kēia papahana e pili ai ia ʻoihana me nā mea pāheona o nā ʻano like ʻole me ke kākoʻo like pū i kā lākou mau wahi e muimui ai, kā lākou mau puke, kā lākou mau pūnaewele, kā lākou mau hanana me nā ʻano papahana like ʻole a lākou. Ke hoʻolālā nei nō ia ʻoihana e hoʻonui ʻia aku kēia papahana me nā hoa ʻoihana ma nā wahi e noho nui ana nā mea pāheona kūʻokoʻa.
KAHUA PAʻA
ʻIKEPILI
WĀ HAʻAWINA KĀLA
HE PAPA NĪNAU
PUʻUHONUA SOCIETY
ANDY WARHOL FOUNDATION FOR THE VISUAL ARTS
E PILI MAI
E loaʻa mai ka nūleka
Puʻuhonua Society
P.O. Box 3080
Honolulu, HI 96802
Donnie Cervantes
Luna Papahana,
Hoʻākea Source
dfc@hoakeasource.org
Emma Broderick
Luna Hoʻokele,
Puʻuhonua Society
emma@puuhonua-society.org
info@hoakeasource.org