Hoʻākea Source

ʻIkepili

No ka hoʻomalele kālā ʻana:
E hāʻawi ana nō ʻo Hoʻākea Source i ʻeono a ʻumikūmālua paha mau haʻawina kālā, mai $5,000 a hiki i $10,000, i nā papahana kūpono i koho a wae ʻia. I loko o nā makahiki mua loa he ʻelua, e kālele ʻia ana nō ia hāʻawi kālā ʻana i nā mea pāheona e noho nei a e hana nei ma ka mokupuni ʻo Oʻahu. Inā naʻe he hui, a noho kekahi lālā ma kahi ʻē, pono nō ka noho ʻana o ke alakaʻi ma Oʻahu. Paipai nui ʻia nā mea noi mai nā lālā mai o nā kaiāulu kolonaio ʻia. Ke wānana ʻia nei ka hāʻawi kālā ʻia ʻana he $60,000 i kēlā me kēia makahiki.


Nā Koina:
E maliu ʻia ana nō nā palapala noi ma luna o kēia mau koina. He pono nō ka pili o kekahi papahana i kekahi o kēia mau ala koʻikoʻi he ʻekolu:

• ʻĀina: ʻO nā noi nō ia e pili paʻa pono ai i kēia wahi ma ke aloha a me ka mālama ʻana i ka ʻāina, ka lani, a me ka moana.
  
  
• Pilina: ʻO nā noi nō ia e hiʻi pono ai i nā pilina koʻikoʻi e pili ai i ko mua, ko hope, me ko ke au nei i loko o ka hui laulima like ʻana. 
  
  
• Huli: ʻO nā noi ia e hōʻoia ʻia aʻe ai he ʻano Kanaka ʻana ma luna o ka ʻike o ka wā ma mua no ka pono o ka noho kanaka ʻana i kēia mua aku.
  
  

E nānā ʻia ana nō nā noi ma ka manaʻo nui o ka pahu hopu a me ka hiki ke hoʻokō pono, a paipai pū ʻia nō nā papahana hoʻokolohua, nā papahana hōʻaʻano, a me nā papahana ʻokoʻa loa. He pono pū nō ko nā mea noi e wehewehe ai i ko lākou pilina iā Hawaiʻi, a me ke ʻano e kūpaʻa ai kā lākou hana ma hope o kēia wahi nei, me ke ʻano e pono ai ʻo Hawaiʻi i kā lākou hana. 

Eia nā mea e pono ai kekahi noi kūpono: 

• Akāka ke kumuhana nui o ke noi, nā mea nāna e komo ana i ka hana, a me ke kuhi pono pū i ke ala koʻikoʻi nui e pili pū ana
• Akāka ka moʻokūʻauhau pāheona Hawaiʻi e pili pū ana i ka hana pāheona a ke noi
• Akāka ka hiki ke hoʻokō i nā pahu hopu o ka papahana i loko o ka palena manawa a me ka palena kālā
• Akāka ke ʻano e pili ai ke kaiāulu nui ākea i ka papahana me ke kālele pū ʻana ma nā ʻano hōʻikeʻike pāheona maʻamau ʻole
• Akāka ka hopena e loaʻa ana i ke kaiāulu nui ākea a me ke kaiāulu pāheona a moʻomeheu hoʻi o Hawaiʻi nei

Ke Kōmike Koho a Wae:
ʻEkolu a ʻelima paha mau lālā o ke kōmike koho a wae, a ʻo ka hapa nui nō hoʻi kekahi mau mea pāheona a kahu mālama hōʻikeʻike pāheona paha mai loko mai o nā kaiāulu Hawaiʻi. Kono pū ʻia nō hoʻokahi a ʻelua paha kahu mālama hōʻikeʻike pāheona mai waho mai o Hawaiʻi nei me ke kākoʻo pū ʻia e ka Luna Papahana me ka Luna Hoʻokele o Puʻhonua Society.

Waele aku ʻo Puʻuhonua Society i nā ʻano ala like ʻole no nā mea pāheona Kānaka, nā mea pāheona pili Hawaiʻi, a me nā mea hana noʻeau e pili ai me ke kaiāulu ma o kā lākou hana. Kākoʻo ʻia nō nā ʻano mea e paio ana no ka pono o ke kaiāulu ma o kā lākou hana pāheona a hana noʻeau paha.

Ma mua o ke kū ʻana aʻe o Puʻuhonua Society, ua hoʻokumu ʻia nō ʻo Young of Heart Workshop & Gallery i ka MH 1972 e Emma Aluli Meyer ma Kailua, Oʻahu i mea e kākoʻo aku ai i ka poʻe ʻōpio ma o ka pāheona. ʻO Emma ke kaikamahine muli loa a Noa Webster Aluli, kekahi loio Hawaiʻi a mea kākoʻo kaiāulu hoʻi.

No nā makahiki 15 a ʻoi, ua mālama ʻia ma ia kikowaena kaiāulu kekahi mau hōʻikeʻike pāheona, a mālama pū ʻia nō kekahi mau papa kālailāʻau, lāmeka, kaha kiʻi, hoʻomākaukau meaʻai, pena kiʻi, a me nā ʻano hana like ʻole. Ma ia manawa, ua mālama pū ʻia nō ka hanana mua loa a ka Honolulu Symphony ma ke Koʻolau; kekahi hōʻikeʻike pāheona a Jean Charlot, Claude Horan, a me Juliette May Frazier, a me ka pukana mua loa o kā Terrance Knapp hōʻikeʻike haʻiʻōlelo kū hoʻokahi no Father Damien.

I ka MH 1996, ua lilo ʻo Maile Meyer, ke kaikamahine ʻekolu a Emma, ʻo ia ka luna hoʻokele, a i ka makahiki 2004, ua kapa hou ʻia ʻo Young of Heart Workshop i kona inoa hou ʻo Pu‘uhonua Society* i mea e kia pono ai ma luna o ke ala nuʻukia hou, ʻo ia ke kū ʻana o kekahi puʻuhonua no nā mea pāheona a kahu moʻomeheu hoʻi. No nā makahiki he 25, ua kuʻupau loa aku ʻo Maile i ka hoʻokahua ʻana aʻe i mau wahi pāheona e like me CONTACT, he hōʻikeʻike pāheona o ke au nei e mālama ʻia ana no nā makahiki he ʻeono; ʻo The Gathering Project, he wahi e hui like ai a pili ke kaiāulu ma ka Hale Aliʻi ʻo Iolani; a ʻo Aupuni Space kekahi hale hōʻikeʻike pāheona o ke au nei me nā keʻena haku pāheona no ke kaiāulu ma Kakaʻako, a mau nō ke kū ʻana o ia hale a hiki i kēia lā nei me nā ʻano papahana kaiāulu like ʻole.

I kēia lā, alakaʻi ʻia ʻo Puʻuhonua Society e ka Luna Hoʻokele ʻo Emma Broderick, ka wahine hanauna ʻekolu o ka ʻohana Meyer, ke kaikamahine mua hoʻi a Maile. He mau papahana hou aku nō ko Puʻuhonua Society: ʻO Keanahala kekahi hui kaiāulu e hoʻomau ana i nā loina ulana lau hala; ʻO Hoʻomau Nā Maka o ka ʻĀina kekahi papahana e mālama pono ʻia ana ko Nā Maka o ka ʻĀina waihona o nā kiʻi ʻoniʻoni he 8,000 a ʻoi; ʻO KĪPUKA kahi e mālama ʻia ai nā ʻano papa aʻo hana noʻeau kuʻuna i mau loa aku ai ia ʻano ʻike i loko o ke kaiāulu; A ʻo NiUNOW! kekahi papahana hoʻōla ʻike niu a uluniu hoʻi i mea e hoʻomanaʻo ai kākou i ko ka niu waiwai i ke ola pono o Hawaiʻi.

* Ua hoʻokumu ʻia ka ʻoihana puʻuhonua mua i ka MH 1914 e kekahi pūʻulu Kānaka Hawaiʻi, a ʻo Noa Webster Aluli kekahi i loko o ia pūʻulu. He kikowaena kōkua a kākoʻo hoʻi ʻo ka ʻAhahui Puʻuhonua o Nā Hawaiʻi no ke kaiāulu Hawaiʻi i loko o ia wā ʻīnea o ka moʻolelo o ko kākou lāhui ma hope o ka noho hewa ʻana i ke Aupuni Hawaiʻi.